Anza na Jaribio Hili la Dakika Moja
Kabla ya kubadilisha chochote, fanya jaribio moja. Unganisha simu kwenye WiFi yako, fungua browser (Chrome au Safari), kisha andika anwani ya ukurasa wa kuingia wa router yako. Kwa router iliyosanidiwa na UpesiLipa anwani hiyo ni:
Andika kwa mkono, ukianza na http:// na siyo https://
Jibu la jaribio hili linakuambia tatizo liko upande gani:
| Kilichotokea | Maana yake | Nenda |
|---|---|---|
| Ukurasa umefunguka kwa mkono | Hotspot iko sawa. Simu haikuweza kugundua yenyewe kwamba kuna ukurasa wa kuingia. | Sababu ya 6 na 7 |
| Ukurasa haufunguki kabisa | Simu ya mteja haifiki kwenye router. Tatizo liko kwenye Access Point au kebo. | Sababu ya 1 hadi 5 |
Sababu ya 1: Guest Network Imewashwa kwenye Access Point
Hii ndiyo sababu tunayoikuta mara nyingi zaidi, hasa kwenye Access Point za TP-Link zilizounganishwa na MikroTik. Guest Network inamzuia mteja kufikia vifaa vya mtandao wa ndani. Ukurasa wa malipo uko kwenye router, na router ni kifaa cha mtandao wa ndani. Kwa hiyo simu inaunganishwa, inapata anwani, lakini haiwezi kufika kwenye ukurasa wala internet.
Suluhisho: ingia kwenye Access Point, nenda Wireless, kisha Wireless Settings, chagua jina la WiFi yako, na uzime Guest Network. Kama kuna chaguo linaloitwa Client Isolation au AP Isolation, lizime pia.
Sababu ya 2: Access Point Iko kwenye Router Mode
Wengi wanatumia router ya nyumbani kama Access Point. Ikibaki kwenye Router mode, inatengeneza mtandao wake mdogo na kugawa anwani zake yenyewe. Wateja wanabaki ndani ya mtandao huo na hawaonekani kwa MikroTik, kwa hiyo hotspot haiwaoni.
Suluhisho: badilisha kifaa kiwe Access Point mode (vifaa vingine huita Bridge mode) na uzime DHCP Server yake. Access Point halisi kama TP-Link EAP haina DHCP ya kuzima. Kama kifaa chako kinagawa anwani, hicho ni router ya nyumbani, siyo Access Point halisi.
Sababu ya 3: Kebo Imechomekwa kwenye Port Isiyo Sahihi
Kwenye MikroTik, port ya kwanza (ether1) kwa kawaida ndiyo inayopokea internet kutoka kwa mtoa huduma wako. Access Point ikichomekwa hapo, wateja wanapita nje ya hotspot.
Suluhisho: kebo ya internet iingie ether1. Access Point ziingie kwenye port nyingine (ether2 na kuendelea). Kwenye Access Point yenye port mbili, tumia port ya LAN au PoE kama mwongozo wa kifaa unavyoelekeza.
Sababu ya 4: Kuna Portal Mbili
Access Point nyingi zina portal yake ya ndani. Ikiwashwa wakati MikroTik nayo ina hotspot, mteja anakamatwa na portal ya Access Point kabla hajafika kwenye ukurasa wako wa malipo. Matokeo ni ukurasa mtupu au ukurasa usio wako.
Suluhisho: kama MikroTik ndiyo inayosimamia malipo, zima Portal kwenye Access Point (Wireless, kisha Portal). Portal iwe sehemu moja tu.
Sababu ya 5: VLAN kwenye Jina la WiFi
Kama jina la WiFi (SSID) limewekewa namba ya VLAN na MikroTik haijasanidiwa kwa VLAN hiyo, wateja wanaingia kwenye njia ambayo router haisikilizi.
Suluhisho: ondoa VLAN kwenye SSID, isipokuwa kama umeisanidi kwa makusudi pande zote mbili.
Sababu ya 6: Simu Inakagua Internet kwa HTTPS
Simu inapounganishwa na WiFi, inajaribu kufungua anwani fulani ili kujua kama kuna internet. Router ya hotspot inaweza kumrudisha mteja kwenye ukurasa wa kuingia kama ombi hilo ni la http. Ombi la https haliwezi kuelekezwa hivyo. Likiachwa, linaning'inia hadi simu ikate tamaa, na simu nyingi za kisasa haziioneshi kabisa ile taarifa ya Sign in to WiFi network.
Suluhisho: router iyakatae maombi hayo ya https haraka badala ya kuyaacha yaning'inie, ili simu irudi kwenye ukaguzi wa http unaofanya kazi. Kwenye router zinazotumia UpesiLipa hili linawekwa lenyewe, huhitaji kuandika amri yoyote. Kama unasanidi router mwenyewe, hili ndilo eneo la kuangalia.
Sababu ya 7: Simu ya Mteja Yenyewe
Wakati mwingine mtandao wako uko sawa na tatizo liko kwenye simu moja tu:
- VPN imewashwa. VPN inapitisha kila kitu kwenye njia yake na ukurasa wa kuingia hautokei. Mteja aizime kwanza.
- Data ya simu imewashwa. Simu inaweza kuamua kutumia data yake badala ya WiFi yako. Mteja azime data kwa muda, aunganishe, kisha alipe.
- iPhone inafunga dirisha dogo. iPhone inaonesha ukurasa wa kuingia kwenye dirisha dogo la muda. Mteja akitoka kwenda kuthibitisha malipo kwenye simu, dirisha hilo linaweza kufungwa. Akirudi, afungue Safari na ukurasa wa malipo utarudi.
- Simu imekumbuka WiFi vibaya. Mteja achague Forget this network, kisha aunganishe upya.
Suluhisho la Haraka: Bango lenye QR
Wakati unatafuta chanzo, usipoteze wateja. Bandika bango dogo lenye QR code inayofungua anwani ya ukurasa wa kuingia, pamoja na anwani yenyewe imeandikwa chini yake. Mteja anaunganisha WiFi, anaskani, na ukurasa unafunguka. Watu wanaskani QR kila siku wanapolipa kwa simu, kwa hiyo hakuna wa kufundishwa.
Orodha ya Kukagua kwa Haraka
- Umejaribu kufungua http://10.5.50.1/login kwa mkono
- Guest Network na Client Isolation zimezimwa kwenye Access Point
- Access Point iko Access Point mode, na haigawi anwani yenyewe
- Kebo ya Access Point haiko kwenye ether1
- Portal iko sehemu moja tu
- Hakuna VLAN kwenye SSID usiyoipanga
- Mteja amezima VPN na data ya simu
Bado Haufunguki? Tuulize
Tuambie una router gani, Access Point gani, na jaribio la dakika moja lilitoa jibu gani. Tutakusaidia kupata chanzo, bila malipo.
Uliza kwenye WhatsApp Jisajili Bure UpesiLipaMaswali Yanayoulizwa Mara kwa Mara
Kwa nini simu inasema Connected, No internet kwenye WiFi ya hotspot?
Ni kawaida kabla mteja hajalipa. Simu imeunganishwa, lakini internet inafunguliwa baada ya malipo au kuingiza kodi. Tatizo ni pale ukurasa wa malipo usipotokea. Hapo kagua Guest Network, mode ya Access Point na port ya kebo.
Ukurasa unafunguka nikiandika anwani kwa mkono lakini hautokei wenyewe. Kwa nini?
Hotspot yako iko sawa. Simu haikuweza kugundua ukurasa wa kuingia, mara nyingi kwa sababu ukaguzi wake wa https unaning'inia, au VPN au data ya simu imewashwa.
Guest Network kwenye TP-Link inaathiri vipi hotspot?
Inamzuia mteja kufikia vifaa vya mtandao wa ndani, ikiwemo router yenye ukurasa wa malipo. Simu inaunganishwa lakini haifiki kwenye ukurasa. Izime.
Kwa nini iPhone inapoteza ukurasa wa malipo?
iPhone inaonesha ukurasa kwenye dirisha dogo la muda. Mteja akitoka kuthibitisha malipo, dirisha linaweza kufungwa. Afungue Safari na ukurasa utarudi.
Je, natakiwa kubadilisha router?
Mara nyingi hapana. Sababu nyingi ziko kwenye mipangilio ya Access Point au kebo, siyo kwenye router yenyewe. Kagua kwanza kabla ya kununua kifaa kipya.